អន្តរជាតិ៖ ប្រទេសហុងគ្រីត្រូវបានគេរំពឹងថានឹងផ្តល់សច្ចាប័នលើការស្នើសុំចូលជាសមាជិកណាតូ (NATO) របស់ស៊ុយអែតនៅថ្ងៃចន្ទនេះ ដែលកន្លងមកហុងគ្រីគឺជាឧបសគ្គដ៏ធំមួយក្នុងការចូលជាសមាជិកនៃអង្គការសន្ធិសញ្ញាអាត្លង់ទិកខាងជើងរបស់ស៊ុយអែត ខណៈកន្លងមកប្រទេសនេះគឺជាប្រទេសអព្យាក្រឹត្យរាប់ចាប់តាំងពីក្រោយសង្គ្រាមលោកលើកទីពីរមក។ 

ការបោះឆ្នោតអនុម័តក្នុងសភាហុងគ្រី ត្រូវគេជឿជាក់ថានឹងឯកភាពលើសំណើរបស់ស៊ុយអែត បន្ទាប់ពីនាយករដ្ឋមន្រ្តីស៊ុយអែតគឺលោក Ulf Kristersson បានធ្វើដំណើរទស្សនកិច្ចទៅកាន់ហុងគ្រីកាលពីថ្ងៃសុក្រ ជាពេលដែលប្រទេសទាំងពីរបានចុះកិច្ចព្រមព្រៀងសព្វាវុធរួមគ្ន។ អ្វីដែលបានឃើញនេះត្រូវបានគេចាត់ទុកថាជាជំហានឆ្ពោះទៅរកបញ្ចប់ការពន្យារពេលជាច្រើនខែនៃការស្នើសុំរកការពង្រឹងសន្តិសុខរបស់ស៊ុយអែត។ 

គួរបញ្ជាក់ថា រដ្ឋាភិបាលរដ្ឋធានី ស្តុកហូម (Stockholm) បានបោះបង់ចោលគោលនយោបាយមិនចូលបក្សសម្ព័ន្ធរបស់ខ្លួន ដើម្បីធានាសុវត្ថិភាពខ្ពស់ជាងមុន ដោយងាកទៅរកអង្គការ NATO បន្ទាប់ពីមានការឈ្លានពានទ្រង់ទ្រាយធំពីសំណាក់រុស្សីទៅលើប្រួទេសអ៊ុយក្រែនកាលពីឆ្នាំ២០២២ កន្លងទៅ។ ប្រសិនបើស៊ុយអែតត្រូវបានអនុម័តឱ្យចូលជាសមាជិកនៃអង្គការ NATO ពិតមែននោះ មានន័យថាស៊៊ុយអែតនឹងក្លាយជាសមាជិកទី៣២ បន្ទា​ប់ពីហ្វាំងឡង់ ហើយវាផ្ទុយនឹងការគោលបំណងរបស់ពូទីន ដែលព្យាយាមកុំឱ្យប្រទេសលោកលិចចូលជាសមាជិកនៃសម្ព័ន្ធភាព NATO។ 

ក្រោយពីហ្វាំងឡង់ត្រូវបានប្រកាសចូលជាសមាជិកណាតូកាលពីឆ្នាំមុន ស៊ុយអែតក៏នៅតែបន្តរង់ចាំចូលជាសមាជិកបន្ទាប់ ដោយផ្អែកលើការសម្រេចចិត្តចុងក្រោយពីសមាជិកចំំំនួន ២ គឺតួកគី និងហុងគ្រី ដែលជាប្រទេសមានទំនាក់ទំនងល្អជាមួយរុស្សី ដោយប្រទេសទាំងពីរនេះបានជំទាស់លើសំណើរបស់ស៊ុយអែត។ តួកគីបានប្រកាសពីការបដិសេធមិនផ្តល់សច្ចាប័នលើសមាជិកភាពរបស់ប្រទេសស៊ុយអែតដោយទាមទារឱ្យមានសកម្មភាពតឹងរ៉ឹងប្រឆាំងនឹងពួកសកម្មប្រយុទ្ធមកពីគណបក្ស Kurdistan Workers' Party (PKK) ដែលរដ្ឋាភិបាលតួកគីអះអាងថា ក្រុមនេះមានមូលដ្ឋានឈរជើងនៅលើទឹកដីស៊ុយអែត៕​